万绮雯早前到泰国为电影《索命童话》开工，期间发生了炸弹爆炸事件，翌日她却到该爆炸地点的假日市场行街，表面好似好「大胆」，但其实只是乌龙一场！
万绮雯对于这桩乌龙事件笑言：「我啱啱去泰国嘅时候，屋企人都千叮万嘱叫我唔好周围去，所以我去咗泰国廿几日，都冇出去行街，每日拍完戏就返酒店，最多都係去附近超级市场买嘢，拍到最后一日，我真係有啲闷，成半个月冇出过街，咪去咗假日市场买贝壳，返嚟先知之前一日原来发生咗炸弹事件。因为已经拍完戏，屋企人係咁叫我返香港，所以我完成工作就走咗。」
万绮雯于新戏中，饰演刘青云老婆，因被人绑架，所以经常要吊威吔，有时还要吊到五、六层楼高，听落都几牙烟，问她有无畏高？她表示：「其实吊到三楼以下嘅高度都ＯＫ，但四、五楼就会有啲惊，套戏其中一场戏仲要係我企喺五楼嘅窗门边缘，然后被推出去，嗰一下离心戏真係几得人惊，但剧组同导演都好好，工作人员有八隻手捉住我成个人，导演彭发就喺我身边帮我同啲泰国工作人员做翻译，仲有青云，佢企喺楼下等我可以望到佢，虽然好细粒，但嗰份支持真係好好，我好庆幸能够同呢套戏嘅台前幕后合作。」
万绮雯曾经在当地的超市迷路，但又误打误撞，认识了一位好nice的伯伯，她表示：「我荡失路嘅时候，见到有一间好似酒吧嘅舖头，入去先知原来係一个艺术家嘅屋企，呢位艺术家收藏咗好多酒樽、古董，佢仲有帮杂志介绍点样装饰屋企小花园，佢以为我哋係游客，仲畀顶草帽同一九四○年嘅古董结他我影相，佢好热情、好好人！之后我都有请佢食饭，答谢佢畀我参观佢间屋。」
 |
